భద్రాద్రి కొత్తగూడెం జిల్లా
తేజ న్యూస్ టీవీ
29 – 11- 2025
రాబోయే గ్రామ పంచాయతీ ఎన్నికల నేపథ్యంలో రావికంపాడు గ్రామంలో ఈరోజు ఎన్నికల అవగాహన కార్యక్రమం నిర్వహించబడింది. ఈ కార్యక్రమానికి కొత్తగూడెం డిఎస్పీ అబ్దుల్ రెహమాన్, జూలూరుపాడు సిఐ లక్ష్మి. చంద్రుగొండ ఎస్సై శివరామకృష్ణ, హాజరై గ్రామ ప్రజలకు ఎన్నికల సంబంధిత అవగాహన కల్పించారు.
ఈ సందర్భంగా డిఎస్పీ మాట్లాడుతూ, ఎన్నికలు ప్రజాస్వామ్య పండుగవంటివని, ప్రతి ఓటరు తన ఓటును భయపెట్టింపులు, లంచాలు లేదా ఇతర ప్రలోభాలేవీ లేకుండా స్వేచ్ఛగా వినియోగించాలని సూచించారు. ఎన్నికల సమయంలో డబ్బుల పంపిణీ, మద్యం సరఫరా, ఓటర్లను బెదిరించడం, అభ్యర్థుల అనుచరుల మధ్య గొడవలు జరిగితే వెంటనే పోలీసులకు సమాచారం అందించాలని గ్రామ ప్రజలను కోరారు.
అలాగే, ఎన్నికలలో అక్రమ కార్యకలాపాల్లో పాల్గొంటే
• వ్యక్తిగత ఫిర్యాదులు,
• కేసుల నమోదు,
• భవిష్యత్ ఉద్యోగ అవకాశాలు మరియు ప్రభుత్వ పథకాలపై ప్రతికూల ప్రభావం
ఉండే అవకాశం ఉన్నందున ఎవరూ శాంతి భద్రతలకు భంగం కలిగించే చర్యలకు పాల్పడరాదని హెచ్చరించారు. చట్ట ఉల్లంఘనలకు పాల్పడిన వారిపై కఠిన చర్యలు తీసుకుంటామని డిఎస్పీ స్పష్టం చేశారు.
గ్రామ పెద్దలు, యువత, మహిళలు, అభ్యర్థుల అనుచరులు పరస్పరం గౌరవాన్ని పాటిస్తూ ఎన్నికల ప్రక్రియలో సహకరించాలని అధికారులు విజ్ఞప్తి చేశారు. ఎన్నికల తర్వాత గ్రామ అభివృద్ధి సమగ్రంగా సాగాలంటే శాంతి వాతావరణం అత్యంత కీలకమని గుర్తు చేశారు.
ఈ కార్యక్రమంలో గ్రామ ప్రజులు, యువత పెద్ద సంఖ్యలో పాల్గొని, ఎన్నికలు శాంతియుతంగా జరిగేందుకు పోలీసులకు తమ సంపూర్ణ సహకారం అందిస్తామని హామీ ఇచ్చారు.
